Nagmugna ug mga proyekto ang Magsaysay Municipal LGU ubos sa pagdumala ni Mayor Engr.Arthur D. Davin uban sa maabtikon nga Bise Mayor Donnabel Joy Mejia ug mga konsehales sa Sannguniang Bayan ug mga proyekto nga nagtumong sa pagpalambo sa mga lugar sa lungsod sa Magsaysay nga naay potensyal nga mga tourist spots. Usa sa mga ginatan-aw nga mahimong tourist attraction sa naasoy nga lungsod mao ang Tahpikong Falls nga nahimutang sa Barangay Malawanit. Sa naasoy usab nga barangay makaplagan ang Stafong Sol Cave ug Sfot Baluen. Tungod sa potensyal sa naasoy nga mga atraksyon, nagapaningkamot ang local nga panggamhanan, pinaagi sa Municipal Engineering Office, nga mapaayo ang dalan paingon sa nasangpit nga lokasyon para mas pamadali ang pagbiyahe sa mga nagkadaiyang matang sa transportasyon, ug mapadali ang pagbiyahe sa mga lumulupyo sa barangay.

Ginapasigarbo usab sa katawhan sa Upper Bala, Magsaysay ang Mapunggis Falls. Kini nga busay naglangkub sa 26 ka mga busay. Dinhi usab makita ang pinakadaku nga kalasangan sa lungsod, kund diin ginapuy-an ug ginaprotektahan sa mga kaigsuonan nato gikan sa tribong Bagobo. Apan bisan sa kaanindot sa lugar, ug kapresko sa tubig nga nagagawas, ginadili sa mga opisyales sa Barangay Upper Bala ang pagligo alang pud sa pagpreserba sa kaanindot sa palibot.

Pipila lamang kini sa mga ginapasigarbong mga atraksyon sa lungsod sa Magsaysay nga ginapaningkamutan sa local nga panggamhanan nga mapreserba ug mapalambo alang sa paglambo sa sector sa turismo ug pagpasigarbo sa datu ug maanindot nga kayamanan nga gihatag sa Labawng Makagagahum sa atoang lungsod.